Lëvizja Vetëvendosje ka propozuar datën 2 shkurt të vitit të ardhshëm për mbajtjen e zgjedhjeve parlamentare. Kështu bëjnë të ditur burime të KosovaPress, brenda VV-së. Presidentja Vjosa Osmani, deklaroi të enjten se ka marrë një propozim nga vetëvendosja për datën e preferuar, por nuk dha më shumë detaje”. Afati për të depozituar propozime për datën e zgjedhjeve për partitë politike është mbyllur. Presidentja Osmani tha se do të shqyrtojë propozimet e marra dhe më pas do të vendosë. Partitë opozitare kanë propozuar mbajtjen e zgjedhjeve në fund të janarit. Megjithatë, çështja e datës ka pak rëndësi, pasi katër datat që lejon ligji janë në harkun kohor të një muaji. Për Vetëvendosjen 2 shkurti është propozimi zyrtar, megjithatë burime nga kjo forcë politike pohojnë se edhe nëse caktohet një datë tjetër nga ana e Presidentes Osmani do ta pranojnë atë pa asnjë rezervë e kundërshti.