Presidenti amerikan Donald Trump, në një deklaratë në Shtëpinë e Bardhë të enjten në mbrëmje pohoi pa prova se atij po i grabitej mandati i dytë. “Nëse llogaritni votat e ligjshme, unë fitoj me lehtësi. Nëse numëroni votat e paligjshme, ata mund të përpiqen të na vjedhin zgjedhjet”, tha Trump. Presidenti tha se avantazhi që ai kishte në shtetet e lëkundura po “eliminohej fshehurazi” ndërsa vazhdonte numërimi i votave. Ish-zvpresidenti Joe Biden, kandidati për president i partisë demokrate, kryeson ndaj Presidentit Trump si në votën popullore ashtu edhe në numrin më të rëndësishëm të votave të Kolegjit Zgjedhor, i cili përcakton fituesin e zgjedhjeve presidenciale. “Ne nuk do të lejojmë që korrupsioni të vjedhë këto zgjedhje të rëndësishme”, u zotua Presidenti Trump, duke shpjeguar se ai është i përgatitur ta çojë këtë çështje në Gjykatën e Lartë të Shteteve të Bashkuara. Në anën tjetër, kandidati demokrat Joe Biden, tha për gazetarët në Delauer, se çdo votë duhet të numërohet. “Çdo votë duhet të numërohet. Dhe kjo është ajo që tani e tutje ne do të shohim. Dhe kështu duhet të jetë. Demokracia nganjëherë është e ngatërruar, nganjëherë ajo kërkon pak durim. Ne nuk kemi dyshim se kur të mbarojë numërimi (i votave), senatorja Harris dhe unë do të shpallemi fitues. Kështu që, unë kërkoj nga të gjithë që të qëndrojnë të qetë”, tha Biden.