Një tjetër subjekt politik tërhiqet nga zgjedhjet e jashtëzakonshme komunale të 23 prillit në veri të Kosovës. Bëhet fjalë për Partinë e Serbëve të Kosovës, teksa vendimin për tërheqjen nga zgjedhjet e komunikoi vetë kryetari i saj, Aleksandar Jabllanovic. Në një konferencë për shtyp të mbajtru në Leposaviq, kreu i Partisë së Serbëve të Kosovës njoftoi se ka vendosur tërheqjen nga zgjedhjet, duke parë kushtet e vështira në të cilat ato po organizohen. Ai solli në vëmendje faktin se një pjesë e mirë e qendrave të votimit, janë kontejnerë të vendosur në anë të rrugës, teksa tha se procesi do të administrohet tërësisht nga policia e Kosovës. Partia e Serbëve të Kosovës ka pasur vetëm një kandidat për zgjedhjet e 23 prillit, pikërisht atë të Jabllanoviç, që garonte për të marrë drejtimin e komunës së Leposavqit. Ai ka bërë thirrje që mbështetësit e partisë së tij, të mos dalin në zgjedhjet e 23 prillit, ndërsa Komisioni Qendror i Zgjedhjeve në Kosovë, tha se Partia e Serbëve të Kosovës do të jetë gjithsesi në listat e votimit, pasi ato janë printuar tashmë.