Kartat e identitetit të cilat skadojnë para 25 Prillit do të jenë të vlefshme deri në datën 30 Prill. Pas mbledhjes së këshillit të ministrave, organizuar ditën e djeshme, ky vendim u botua zyrtarisht sot në fletoren zyrtare. Duke qenë se ishin të shumtë qytetarët, të cilët si pasojë e skadimit se letënjoftimit elektronik, nuk do të mund të votonin në zgjedhjet elektorale të këtij viti, miratimi i këtij vendimi lindi si domosdoshmëri për garantimin e të drejtës qytetare për të votuar në zgjedhjet e 25 Prillit. Ky vendim vjen pas kërkesës së kreut të Komisionit Qendror të Zgjedhjeve, Ilirjan Celibashi, i cili përmes një postimi në rrjetin social, twitter i ka bërë thirrje ministrit të brendhshëm të vendit, Bledi Çuçi, për marrjen e këtij vendimi. Për problemin e shtyrjes së afatit të dokumentit të identifikimit biometrik, janë shprehur më herët edhe aktorë të tjerë të rangut politik në Shqipëri dhe duket se miratimi i këtij vendimi do t’i hapë rrugën pjesëmarrjes së plotë të gjithë qytetarëve Shqiptarë në përzgjedhjen e qeverisë së ardhshme.