Numri i votuesve për zgjedhjet e 9 shkurtit që pritet të mbahen në Kosovë, është 2 milionë e 75 mijë e 868 votues. Nga këta, numri i personave që janë regjistruar për votim jashtë territorit të Kosovës është afro 105 mijë votues. Keto të dhëna janë njoftuar gjatë mbledhjes së Komisionit Qendror të Zgjedhjeve. Anëtari i KQZ-së nga PDK, Arianit Elshani tha se lista përfundimtare e votuesve nuk është plotësisht e pastër për shkak se qytetarët nuk i kanë lajmëruar në organet kompetente personat që kanë ndërruar jetë. “Ky numër i votuesve që është prej 2 milionë e 75 mijë e 868 votuesve si listë përfundimtare. Nuk është një listë tërësisht e pastër, për faktin që figurojnë ende personat e vdekur në këto lista, për shkak se qytetarët nuk ia kanë njoftuar organet kompetente...Ndryshe nga çdo palë zgjedhje tjetër që është mbajtur më parë, në këto zgjedhje lista e votuesve është krijuar me dy data baza...Ndërsa, numri i personave që janë regjistruar për votim jashtë Kosovë është 104 mijë e 924 votues, prej të cilëve 84 mijë e 525 kanë zgjedhur mënyrën e votimit përmes postës dhe 20 mijë e 399 votues kanë zgjedhur mënyrën e votimit fizik në përfaqësi diplomatike. Në dallim prej zgjedhjeve të fundit lokale të 17 dhjetorit është 174 mijë e 888 votues më shumë”.