Presidenti Volodymyr Zelensky ka zhvilluar një bisedë të rëndësishme telefonike këtë të dielë me homologun e tij turk Recep Taip Erdogan, ku folën edhe njëherë për situatën e nxehtë mes dy vendeve, Rusi-Ukrainë. Lajmi u konfirmua nga faqja zyrtare e presidentit ukrainas në Twitter, ku Zelensky shkruan se ai kërkoi ndihmën e Turqisë për një evakuim të menjëhershëm të civilëve nga Mariupoli, duke përfshirë Azovstal, dhe shkëmbim të menjëhershëm të trupave të bllokuara. Një ditë më parë, lideri i Ukrainës, kërcënoi dhe njëherë se do të tërhiqej nga çdo negociatë me Moskën nëse trupat ruse do të sulmonin mbrojtësit e fundit ukrainas të strehuar në fabrikën e çelikut Azovstal - një zonë kjo e madhe industriale në Mariupol. Vlen të theksojmë se Turqia ka marrëdhenie të mira me të dyja vendet, Rusinë dhe Ukrainën dhe se presidenti turk ka luajtur një rol kyc në përpjekjet e tij të herëpashershme për të zbutur tensionet mes dy kombeve.