Presidenti i Ukrainës, Volodymyr Zelensky, paralajmëroi se ushtria e tij po përballet me kushte “tejet të vështira” dhe me mungesë municioni në vijat e frontit, pas vendimit për t’u tërhequr nga qyteti strategjik juglindor, Avdivka, me qëllim që të shpëtoheshin jetë dhe armatime përballë një sulmi të fuqishëm nga rusia. “Gjendja është tejet e vështirë tani në disa pjesë të vijës së frontit, ku trupat ruse kanë vendosur burime maksimale”, tha Zelenski pas një vizite në vijën e frontit, ku u takua me trupat ukrainase. “Ata po i shfrytëzojnë vonesat e ndihmave për Ukrainën”, tha Zelensky në një video mbrëmjen e të hënës, duke iu referua lutjeve urgjente të tij për partnerët e Perëndimit për predha shtesë artilerie dhe armë të tjera mbrojtëse dhe sulmuese. Zelensky vizitoi vijën e frontit në qytetin verilindor, Kupianks, ku u takua me liderët e brigadës. Ai e vizitoi këtë komandë vetëm pak orë pasi Rusia mori në dorë fabrikën më të madhe të qymyrit në Avdivka, ku Kievi e pranoi disfatën javën e kaluar duke i tërhequr trupat nga qyteti. Rënia e Avdivkës, dikur qytet i rreth 30.000 banorëve por tani i bërë rrafsh me tokën dhe i shkretuar, në rajonin lindor të Donjeckut, shënon fitoren më të madhe territoriale të Rusisë në nëntë muajt e fundit. Forcat ukrainase raportuan për sulme ruse gjatë natës së kaluar, të cilat duket se kishin për qëllim marrjen e më shumë territoreve në afërsi, si dhe ofensiva të ndara në verilindje dhe në jug të vendit. Ndërkohë, komanda ushtarake perëndimore e Ukrainës tha të hënën se ushtria ruse kishte tentuar përsëri të thyejë pozicionet ukrainase në zonat përreth Zaporizhjas.