Një tjetër person mësohet se është shpallur në kërkim nga policia e Elbasanit për vrasjen e biznesmenit Mondi Mëhalla. Oklid El Ouejdi, 35-vjeç dyshohet se është i përfshirë në ekzekutimin e 43-vjeçarit që njihej dhe me emrin Edmond Hyka. Emri i El Ouejdi, sipas burimeve të Top Channel, mësohet se ka dalë në dritë nga dëshmitë që kanë dhënë personat e arrestuar gjatë marrjes në pyetje. Naldo Gjoni nga Lezha, i cili u ndalua nga policia pasi kishte përdorur makinën me te cilën u krye ekzekutimi ka deklaruar gjatë marrjes në pyetje se i pranishëm kur ka marrë në përdorim mjetin ishte edhe Oklid El Ouejdi. Nga të dhënat, që kanë grumbulluara hetuesit deri më tani rezulton se El Ouejdi është larguar nga vendi drejt Maqedonisë së Veriut nga pika kufitare e Qafë-Thanës. Biznemeni Mondi Mëhalla u ekzekutua me tre plumba sapo hipi në makinën e tij. Ai u qëllua në biznesin e tij, ndërsa në pranga kanë përfunduar Xhino Ago, ortak i Mëhallës, Nevrus Spaho dhe roja i karburantit Kujtim Pisha. Ndërkohë dy të tjerë ndodhen në kërkim.