Kandidatja e Vetëvendosjes për kryetare të Kuvendit të Kosovës, Albulena Haxhiu nuk përjashtoi mundësinë që partia e saj të dalë me një emër tjetër për këtë post. Haxhiu - “Sa herë të flisni për propozimin e Vetëvendosjes, ta merrni përgjigjen nga Lëvizja Vetëvendosje. Lëvizja Vetëvendosje e ka dhënë propozimin e saj dhe në këtë drejtim ne nuk po flasim më për emrin, po flasim për Komisionin për votimin e fshehtë. Kushedi, ndoshta Vetëvendosja do ta ketë një qëndrim tjetër. Por, një herë po flasim për Komisionin për votimin e fshehtë. Por, opozita s’po lejon as të shkojë te propozimi i radhës, por që është e rëndësishme që të vazhdojmë”. Ashtu si Albin Kurti, edhe Haxhiu fajtorët për ngërçin e krijuar i gjen në krahun opozitar. “Në vend që të kishim një përpjekje edhe nga ana e deputetëve të opozitës, madje edhe kryetarëve të partive opozitare që ta konstituojnë Kuvendin e Kosovës, ne çfarë kemi parë siç edhe sot ndodhi, ata vijnë në Kuvend dhe nuk marrin fare pjesë në votim. Unë nuk e di nëse e keni pasur rastin që të pyesni deputetët e opozitës, shumë thjesht – pse vijnë në seancë?” Konstituimi i Kuvendit të Kosovës dështoi për herë të 37 këtë të mërkurë, ndërsa seanca e radhës është caktuar të premten.