Departamenti amerikan i Shtetit tha se vlerëson partneritetin e vazhdueshëm të Serbisë "në luftimin e agresionit të Rusisë në Evropë dhe në ndihmën humanitare për popullin ukrainas”. Në një përgjigje dërguar Radios Evropa e Lirë, DASH tha se bashkëpunimi i Shteteve të Bashkuara me udhëheqësit serbë është i fokusuar në "forcimin e partneritetit strategjik mes dy vendeve, ndërsa Serbia ndërton një të ardhme të sigurt dhe prosperuese në Evropë që është e paprekshme nga shantazhi politik dhe ekonomik i Rusisë". Ky institucion u pyet që të komentonte akuzat e bëra nga aktivisti rus, Andrei Pivovarov, i cili tha se zëvendëskryeministri i Serbisë, Aleksandar Vulin, ishte përfshirë në arrestimin e tij më 2021. Por, DASH tha se Vulin vazhdon të jetë në listën e sanksioneve amerikane. “Qëndrimi ynë sa i përket Aleksandar Vulinit tashmë dihet. Ai vazhdon të jetë nën sanksione amerikane. SHBA-ja nuk ka asnjë rol në emërimin e pjesëtarëve të Qeverisë serbe”, tha DASH. Vulin ishte ministër i Brendshëm i Serbisë kur Pivovarov u arrestua në maj të vitit 2021. Pas lirimit të tij, që u bë në kuadër të këmbimit më të madh të të burgosurve mes Rusisë dhe Perëndimit më 1 gusht, aktivisti rus në një intervistë për të përjavshmen serbe, Radar, tha se ai ishte arrestuar pas informacionit për të që Vulin supozohet se i dha shërbimeve sekrete ruse. Tre vjet më parë, pretendime të njëjta ishin bërë edhe nga gazetari dhe aktivisti rus, Vladimir Kara-Murza, po ashtu i liruar më 1 gusht, por, atëherë Vulin i kishte mohuar të gjitha akuzat. Serbia është një prej shteteve të pakta evropiane që nuk ka vendosur sanksione ndaj Moskës për shkak të pushtimit të Ukrainës, gjë që Brukseli vazhdimisht e kërkon nga Serbia, pasi është shtet që aspiron anëtarësimin në BE. Vulin, njihet për raporte të ngushta me Rusinë. Ai madje është nderuar me medalje nga Shërbimi Federal i Sigurisë të Rusisë (FSB) për “profesionalizmin e lartë dhe kontributin në bashkëpunimin mes shërbimeve serbe dhe ruse”. Ndërsa, presidenti rus, Vladimir Putin, i ka akorduar atij “Urdhrin e Miqësisë”.