Presidenti i Serbisë, Aleksandar Vuçiç ka komentuar i shqetësuar pas lajmit se kompania e Jared Kushnerit, dhëndrit të presidentit amerikan Donald Trump, ka tërhequr investimin e saj nga projekti për ndërtimin e një kompleksi luksoz në Beograd, në vendin ku më parë ishin ndodhur ndërtesat e Shtabit të Përgjithshëm të Ushtrisë së Jugosllavisë, të shkatërruara gjatë bombardimeve të NATO-s në vitin 1999. Vuçiç theksoi se Serbia ka humbur një mundësi të vlefshme investimi prej të paktën 750 milionë eurosh, për shkak të kundërshtimeve dhe protestave që janë zhvilluar ndaj projektit. Ai e quajti këtë një "gjueti shtrigash" që ka dëmtuar mundësitë e zhvillimit të vendit dhe e konsideroi si të dëmshme për Serbinë. “E humbëm një mundësi të madhe. Sot flitet keq për Serbinë, sepse disa thonë se ky ishte një projekt i keq. Një projekt më i vogël, ose më i dobët, që u bë me ngut në Shqipëri, ka marrë shumë vëmendje dhe do të ketë publicitet të shkëlqyer, sepse e gjithë familja Trump do ta lavdërojë”, tha Vuçiç, duke iu referuar planit të Kushnerit për investime në Ishullin e Sazanit në Shqipëri. Tërheqja e investimit u njoftua më 15 dhjetor, një ditë pas ngritjes së aktakuzës nga Prokuroria për Krim të Organizuar në Serbi ndaj ministrit të Kulturës, Nikolla Sellakoviç për shkelje të ligjit gjatë heqjes së statusit të monumentit kulturor të ndërtesës së Shtabit të Përgjithshëm.