Ndërsa Serbia po vlon nga protestat masive të studentëve dhe opozitës, Presidenti, Aleksandar Vuçiç, tha të hënën në një adresim publik se do t’i dërgojë një kërkesë Qeverisë serbe “për ristrukturimin më urgjent dhe më masiv të mundshëm”. “Në këto kohë të vështira politike, është bërë e qartë se kush është i gatshëm të punojë dhe të luftojë, kush jo, dhe duke pasur këtë parasysh, pres që më shumë se 50 për qind e ministrave të shkarkohen dhe zëvendësohen në një ristrukturim shumë, shumë urgjent”, tha ai duke theksuar se klima e krijuar në vend pas aksidentit në Novi Sad, ku humbën jetën 15 persona, nuk është e mirë për askënd, ndërsa ftoi studentët për dialog. “I kemi ofruar të gjitha. Nuk ekziston asnjë dokument që ka të bëjë me rindërtim të stacionit hekurudhor”, deklaroi Vuçiç ndërsa njoftoi se autoritetet kanë nisur hetimet për 37 persona që I kanë sulmuar protestuesit. Kërkesë kjo e bërë nga studentët që ranë pre e dhunës. Sa i përket kërkesës së studentëve për t’i hedhur poshtë akuzat penale kundër protestuesve, Vuçiç deklaroi se ekziston dyshim i bazuar se disa prej tyre kanë kryer shkelje penale, por që është gati të nënshkruajë vendim për falje nga proceset gjyqësore, nëse nuk ka zgjidhje tjetër.