Një dorë në bakllava e një në revani, kështu është situata e serbëve në raport me perëndimin e Rusinë. Teksa vijon interesin për anëtarësim në Bashkimin Europian, në anën tjetër nuk pranon tu bashkohet sanksioneve ndaj saj për agresionin e paprovokuar ndaj Ukrainës, e për më tej vijon bashkëpunimin me Rusinë dhe presidentin Vladimir Putin. Kjo u pa edhe me vizitën e fundit të zëvendëskryeministrit serb, Aleksandër Vulin në Rusi, në takimin ngazëllyes me kreun e shtetit, Vladimir Putin, duke premtuar besnikërinë e Beogradit zyrtar. Por përkundër kësaj, Serbia sërish kursehet nga qëndrimet më të ashpra të SHBA e BE. Për këtë diplomati amerikan në pension, Charles Kupchan, ka një përgjigje. Sipas tij, kritikat më të ashpra nga SHBA e BE ndaj Beogradit, mund të rrezikonin që ky i fundit të afrohej edhe më shumë me Rusinë.