Presidenti i Serbisë, Aleksandar Vuçiç ka firmosur marrëveshjen për shërbimin e rregullt ushtarak për 75 ditë. “Dua të besoj se Qeveria e Serbisë do ta miratojë këtë vendim”, tha Vuçiç të shtunën gjatë ceremonisë së ndarjes së gradave për oficerët e rinj të Forcave të Armatosura të Serbisë. “Dua të besoj se të gjithë e kuptojnë se sa shumë kemi nevojë për një ushtri të fortë, se sa më shumë armë do të duhet të blejmë e të prodhojmë, sepse nuk është dëshira jonë që të sulmojmë askënd dhe as që do ta bëjmë këtë. Por, dëshira jonë është të pengojmë këdo që na kërcënon, pa pasur frikë”, shtoi ai, duke mos specifikuar se kush po e kërcënon Serbinë. Një ditë më parë kryeministri serb, Millosh Vuçeviç, tha se Qeveria serbe është e gati, nëse arrihet një marrëveshje politike dhe shoqërore, për të dërguar shpejt në Kuvendin serb projektligjin për kthimin e shërbimit ushtarak. “Më 2025, kur të arrihen kushtet administrative dhe logjistike, ne do të nisim me shërbimin ushtarak”, tha Vuçeviç. Kroacia fqinje po ashtu ka njoftuar se duke nisur nga 1 janari i vitit 2025 do të rikthejë shërbimin e detyrueshëm ushtarak me një kohëzgjatje prej dy muajsh. Në Serbi shërbimi i detyrueshëm ushtarak u hoq më 1 janar 2011, që atëherë vetëm ata që duan, shkojnë vullnetarisht në ushtri. Vendet evropiane që nuk e kanë hequr shërbimin e detyrueshëm ushtarak janë Zvicra, Norvegjia, Danimarka, Finlanda, Austria, Turqia, Estonia, Rusia, Bjellorusia, Ukraina, Greqia dhe Qipro.