Studentë, gjimnazistë, mjekë, mësues, fermerë dhe biznesmenë. Mbi 300 mijë serbë u mblodhën në sheshin qendror të Beogradit për të protestuar kundër Presidentit Aleksandër Vuçiç me kërkesën kryesore për luftë kundër korrupsionit. Protesta e paralajmëruar kombëtare për nga përmasat konsiderohet e ngjashme me ato që çuan në rrëzimin e Sllobodan Millosheviçit pranverën e vitit 2000. Tubimi, që nisi si një reagim kundër autoriteteve për vdekjen e 15 personave në stacionin hekurudhor të Novi Sadit është shndërruar në një lëvizje kundër Presidentit Vuçiç, ku për javë me radhë Beogradi dhe qytetet e tjera të mëdha të Serbisë janë paralizuar edhe nga grevat. Organizatorët e protestës kërkuan nga ana e pjesëmarrësve që të tregohen të kujdesshëm dhe të shmangin përplasjet me grupin e Aleksandër Vuçiç. Presidenti thirri një antimiting, por që dështoi për shkak të pjesëmarrjes së ulët.