Pasi siguroi presidentin rus Vladimir Putin se nuk do t’i vendos kurrë sanksione Moskës për shkak të agresionit në Ukrainë, presidenti serb Aleksandar Vuçiç, u tha të dielën zyrtarëve amerikanë dhe evropianë se Serbia është e përcaktuar për integrimet evropiane. Teksa njoftoi se priti në Beograd, Ndihmës Sekretari amerikan James O’Brien, presidenti serb bën me dije se bisedimet u përqendruan në rreth zhvillimeve politike në Kosovë dhe rolin e Serbisë në Ballkanin Perëndimor dhe në Evropë. “I informova bashkëbiseduesit në hollësi për situatën në Kosovë dhe shpreha shqetësimin tim të thellë për sfidat me të cilat përballet populli serb çdo ditë. Theksova nevojën për një angazhim më të madh të Shteteve të Bashkuara në këtë çështje, pasi mbështetja më e fortë dhe pjesëmarrja aktive e Shteteve të Bashkuara mund të kontribuojë në qëndrueshmërinë dhe sigurinë në rajon”, shkroi Vuçiç në rrjete sociale.