Narrativi me të cilin qeveria e presidentit serb, Aleksandër Vuçiç po përpiqet t'i kundërvihet valës së protestave nga lëvizja studentore, duke e quajtur atë një "revolucion me ngjyrë", po nxit më tej incidentet. Rasti i fundit është sulmi me thikë ndaj dekanes së Fakultetit Filozofik në Nish, Natalija Jovanoviç, nga një grua e panjohur, duke e plagosur në dorë, dhe duke e kërcënuar se do t'i hidhte acid. Bllokadat e më shumë se 60 fakulteteve të të katër universiteteve shtetërore në Serbi janë shndërruar në një lëvizje studentore që ka marrë mbështetje të madhe publike, nga komuniteti akademik, pedagogët, avokatët, sindikatat dhe fermerët e deri te shoqatat, lëvizjet dhe grupet e shumta shoqërore. Mbështetësit e SNS-së më pas sulmuan një grup studentësh të Novi Sadit gjatë natës ndërsa ata po vendosnin postera nëpër qytet dhe thyen nofullën e një studenteje me shkop bejsbolli, dhe këtë javë një student u plagos rëndë në një sulm nga një grup banditësh në Novi Sad. Vuçiç akuzon lëvizjen studentore, se kanë penguar përparimin ekonomik të Serbisë me katër muaj protesta. Ai gjithashtu pohon se protestat dhe bllokadat e studentëve po shkaktojnë "zemërimin e një Serbie të denjë", i cili po rritet dhe nuk është i lehtë për t'u kontrolluar. Protesta e madhe në të cilën ai thirri mbështetësit e tij më 28 mars në Beograd, duke e shpallur si "më masivin në historinë e Serbisë", nuk arriti të realizohej.