Një punonjës i Policisë së Kosovës, I identifikuar si Muhamed Lika, është qëlluar me armë zjarri, në hyrje të banesës së tij, rreth orës 23:00 mbrëmjen e të martës, në qytetin e Kaçanikut, në jug të Kosovës. Sipas policisë, ai është gjetur i plagosur rëndë në hyrjen e ndërtesës ku banonte. Punonjësi i Policisë mësohet se ishte transportuar për në Qendrën e Mjekësisë, në Kaçanik, por nuk kishte arritur t’u mbijetonte plagëve të marra. Autoritetet njoftojnë se ende nuk dihen motivet e kësaj ngjarje, ndërsa autori i dyshuar është ende në arrati, sakaq ekipet policore po vijojnë kërkimet për gjetjen e tij. Për vrasjen kanë reaguar familjarët e rreshterit, duke thënë se ai u vra para banesës së tij në mënyrë tinëzare. I ndjeri ishte po ashtu ushtar i Ushtrisë Çlirimtare të Kosovës.