Policia e Kosovës doli këtë të mërkurë me një qëndrim dhe reagim zyrtar lidhur me vrasjen e 27-vjeçarit Agon Zejnullahu në Lipjan, nga 5 efektivë, të cilët gjatë prangosjes së tij, ushtruan dhunë, si pasojë e të cilës dyshohet se ai humbi jetën. Në reagimin zyrtar, policia thekson se “në datën 07.07.2025, rreth orës 00:12, ka pranuar informacionin përmes gjashtë thirrjeve telefonike nga qytetarët se një person me sjellje agresive, përmes veprimeve të tij po paraqiste rrezikim të përgjithshëm të kalimtarëve duke i sulmuar ata por dhe të vetes së tij, duke ndjekur automjetet dhe duke tentuar të hynte në to”. Sipas policisë, të njëjtat sjellje janë konstatuar edhe në prani të policisë, çka ka bërë që kjo e fundit të ndërhyjë për të garantuar siguri për qytetarët dhe ndalimin e tij.