Prokuroria ka mbyllur hetimet dhe ka kaluar për gjykim në gjykatën e Lezhës dosjen për vrasjen e Mariglen Gjonajt. Krimi dyshohet se është kryer nga shtetasi Kristjan Cenaj, 31-vjeç, mik me viktimën. Akuza e ngritur ndaj tij nga ana prokurorisë është ajo e vjedhjes me pasojë vdekjen. Në dosjen e prokurorisë thuhet se në vitin 2015 për t’i grabitur orën “Rolex” dhe një varëse floriri, Kristjan Cenaj ekzekutoi mikun e tij, atëherë 16-vjeçar. Eshtrat dhe mbetjet kockore të Mariglen Gjonajt u gjetën në 03 prill 2022 në Fushë Kuqe, pas shumë kërkimeve nga ana e familjarëve. Cenaj ra në prangat e policisë një vit më parë, vetëm pak minuta pas kishte përfunduar dasmën e të vëllait të tij, ndërsa kishte ardhur nga Italia posaçërisht për këtë gëzim familjar në Kurbin. Policia dhe prokuroria e Laçit, kishin informacione mbi vizitën e tij, dhe sapo ai ka hyrë në territorin shqiptar, në sistemin TIMS është vendosur shënimi për ndalim dalje në kufi të tij. Nga hetimet e kryera ka rezultuar se Cenaj është identifikuar si autor i dyshuar i vrasjes së Mariglen Gjonaj përmes qelizave telefonike dhe profilit të tij në “Facebook”.