Deri pak vite më parë, Ekuadori ishte një vend relativisht i qetë, në krahasim me vendet e tjera të rajonit në Amerikën Latine. Trafiku i kokainës ekzistonte, por përmasat e tij nuk ishin në nivelet aktuale dhe as krimet e lidhura me drogën. Por, gjithçka ndryshoi kur në Kolumbi u arrit një marrëveshje mes qeverisë dhe rebelëve të FARK-ut, që zhvendosi gjithë trafikun e kokainës drejt Ekuadorit. Deri para kësaj marrëveshjeje, përllogaritej se nga Ekuadori kalonte deri në 50 tonë kokainë në vit tranzit, sot shifra kalonë 800 tonët. Portet ekuadoriane kanë rënë nën kontrollin e bandave ndërkombëtare të trafikut, mes të cilave edhe shqiptare, kartelet vendase janë fuqizuar dhe veç grupeve europiane kanë vendosur lidhje të drejtpërdrejt edhe me meksikanët e Sinaloas, që besohet se kryejnë transportin për në tregun amerikan të kokainës.