Drejtësi për efektivin e forcave “Shqiponja” Novruz Cenalia që u ekzekutua këtë të hënë me armë zjarri në fshatin Baltëz premtoi Drejtori i Përgjithshëm i Policisë, Muhamet Rrumbullaku. Përmes një deklarate për shtyp, kryepolici u zotua se do të bëj gjithçka që të vendos para ligjit autorin e dyshuar Asgan Mernica. “E kam theksuar me forcë, edhe pak ditë më parë, gjatë ceremonive përkujtimore për të rënët e policisë, se uniforma e Policisë së Shtetit është e shenjtë. Kushdo që guxon të cenojë uniformën e policisë, shëndetin dhe jetën e punonjësve të saj, do të marrë përgjigjen më të ashpër ligjore.”, theksohet në deklaratën e shpërndarë për mediat. Krimi ndodhi rreth orës 13:15 ku teksa viktima ishte nisur për të marrë shërbimin kur u konfliktua me autorin që nxori armën dhe e qëlloi duke i shkaktuar vdekjen e menjëhershme. Shkak paraprak për vrasjen dyshohet se u bë një konflikt i çastit mes tyre.