Ekspertët kanë caktuar dëmshpërblimin për familjarët e ish-kryekomisarit të vrarë, Artan Cuku. Pak muaj më parë, familjarët e të ndjerit ngritën një padi në Gjykatën Administrative, duke kërkuar dëmshpërblim nga Drejtoria e Policisë dhe Ministria e Brendshme. E ndërsa këtë të premte, mësohet se ekspertët kanë caktuar dëmin prej 130 milionë lekë të reja, që Drejtoria e Policisë dhe Ministria e Brendshme i detyrohen familjes së Cukut. Kujtojmë se familjarët kërkonin nga institucionet shtetërore t’i dëmshpërblejnë për dënimin pasuror dhe jopasuror që iu ka ardhur si rezultat i humbjes së jetës së familjarit të tyre, të ndjerit Artan Cuku për shkak të detyrës së tij, si ish-drejtues i Policisë së Shtetit. Sakaq nga autoritetet bëhet e ditur se seanca e radhës në Gjykatën Administrative do të zhvillohet më 8 shkurt. Ish-drejtori i Policisë së Vlorës, u qëllua për vdekje mbrëmjen e 8 prillit 2017, teksa po ngjiste shkallët për të shkuar në shtëpinë e tij.