Gjykata e Apelit në Shkodër la në burg dy të rinjtë të cilët shoqëronin Aldi Ramën në momentin e përplasjes me policinë, ku humbi jetën efektivi Saimir Hoxha. Ata do të qëndrojnë në arrest me burg. Në këtë mënyrë është lënë në fuqi vendimi i Gjykatës së Shkallës së Parë Lezhë, duke rrëzuar kërkesën e Armando Markut dhe Kristjan Sherrit të cilët kërkonin një masë më të butë. Mbi ta rëndon akuza e “moskallëzim krimi”, pasi të dy këta persona ishin në makinë me Aldi Ramën në momentin kur u vra efektivi në Lezhë. Rreth një muaj më parë efektivë të Policisë së Lezhës, përfshirë edhe kreun e krimeve kishin marrë informacion për një parcelë me kanabis të mbjellë në zonën e Kune Vain dhe mëngjesin e 28 shtator-it asgjesuan afro 110 bimë. Teksa ktheheshin nga parcela me kanabis që kishin shkatërruar, punonjësit e policisë pikasin një makinë me tre të rinj që po vinte drejt tyre. Nisur nga mosha e re e të rinjve, dhe nga qëndrimi i tyre dyshues, 3 punonjësit e policisë i kanë ndaluar ata për kontroll.