Autoritetet belge kanë identifikuar autorin e dyshuar për vrasjen e Ardit (Arjan) Spahiut, i cili u ekzekutua me 8 plumba në Bruksel në nëntor të vitit 2020. Përmes një letërporosie dërguar autoriteteve shqiptare në fillim të muajit Mars, ata kanë kërkuar marrjen në pyetje, si dhe kontrollin e banesave në pronësi të shtetasve të identifikuar me inicialet F.M. dhe O.V. Burime bëjnë me dije se banesat e identifikuara në pronësi të këtyre personave ndodhen në Tiranë Për këtë proces pritet që në vendin tonë të vijnë dy hetues dhe një gjyqtar belg. Në pyetje pritet të merren edhe dy persona të tjerë në cilësinë e dëshmitarëve. Kjo është letërporsia e dytë e dërguar për këtë vrasje, e para e mbërritur në Maj të 2021 kishte synim pyetjen e njerëzve më të afërt të viktimës për të kuptuar nëse ata kishin persona të dyshuar. Një dëshmi kryesore për autoritetet belge ishte ajo e Erion Alibej,aktualisht i arrestuar si organizator i dy vrasjeve në Elbasan. Ai është kunat i Spahiut. Krimi dyshohet se ka ndoshur për shkaqe hakmarrje, konflikt i nisur fillimisht për prishjen e pazareve të drogës. Ardit (Arjan) Spahiu njihej ndryshe dhe si Arjani i Vogël. Ai ka qenë i akuzuar 11 vjet më parë si organizator i vrasjes se Gëzim Alikajt, ngjarje e ndodhur në qytetin e Elbasanit.