Pas Kavajës dhe Rrogozhoninës, kryebashkiaku Erion Veliaj vijoi me fushatën në Krrabë, Petrelë dhe Bërzhitë, ku në një takim me banorët, vuri në dukje faktin që periferia e kryeqytetit, ndryshe nga cka qenë me parë, ka pësuar trasformim madhor. Kandidati për Bashkinë e Tiranës, kërkoi votën e banorëve për të ecur para me investimet, dhe u kërkoi atyre të mos kthehen pas te ata që sot nuk shkojnë dot as deri në Rinas se janë ‘non grata’. “Ata e kanë një hall se nuk marrin dot vizë amerikane. Por, ky nuk është halli ynë, që dikush nuk shkon dot deri në Rinas. Nuk është as faji ynë që i vunë flakën Gërdecit dhe hodhën njerëzit në erë nga babëzia. Nuk është faji ynë që dikush vrau njerëz me plumba në mish, në Bulevard, të paarmatosur, pa u futur fare te rrethi i Kryeministrisë. Ky është problemi i tyre, është halli i tyre. Po të kishin ata hallet e njerëzve, do kishin ardhur ta bënin rrugën edhe në Krrabë, edhe në Mushqetë, do kishin ardhur të bënin rrugën edhe në Hekal, do kishin ardhur të bënin edhe qendrën në Qeha, do e kishin bërë edhe shkollën “Feti Fanaj”. Për të gjithë këto arsye, miqtë e mi është shumë e rëndësishme të kuptojmë se çfarë fuqie ka vota jonë”.