Kolegji Zgjedhor rrëzoi kërkesën e Partisë Demokratike dhe la në fuqi vendimin e Komisionit për Ankesat dhe Sanksionet, që detyron komisionerët e KZAZ-së së diasporës që të numërojnë fletët e votimit të ardhura nga Greqia. Bëhet fjalë për 53 mijë zarfe që kundërshtohen nga Partia Demokratike me arsyetimin se shumica e tyre kanë ardhur jashtë rrugës zyrtare në KQZ dhe janë manipuluar. Më herët edhe komisioneri shtetëror i zgjedhjeve urdhëroi numërimin e 53 mijë zarfeve. Vendimi i Celibashit u ankimua nga PD fillimisht në KAS dhe më pas në Kolegjin Zgjedhor. Beteja për votën e emigrantëve në Greqi vijon prej ditësh. PS shpreson që me votën e tyre të përmbysë rezultatin në Qarkun e Lezhës dhe të konsolidojë mandatet në Fier dhe Vlorë. Pas vendimit të Kolegjit Zgjedhor është vendosur që numërimi në KZAZ-në e Diasporës të ngritur në Parkun Olimpik në Tiranë të rifillojë paraditen e së shtunës. Të dhënat zyrtare nga KQZ tregojnë se janë numëruar 147 mijë vota të diasporës nga 194 mijë në total. Pas përfundimit të procesit të numërimit të votave për partitë, pritet që të nisë numërimi i votës për kandidatët.