Një zjarr masiv ka përfshirë një zonë ullishtesh në fshatin Panaja në Vlorë, mëngjesin e kësaj të marte. Flakët masive kanë përfshirë shkurre dhe pemë të drunjta, ndersa raportohet se janë djegur dhjetra hektarë ullinj. Sipas burimeve që ndodhen në vendin e ngjarjes, një zjarrëfikës ka mbërritur menjëherë në fshatin Panaja, për të shuar flakët, mirëpo situata duket e papërballueshme. Banorët e zonës përreth shprehen se nëse flakët favorizohen nga era apo nëse nuk arrihet të shuhet zjarri, flakët mund të kalojnë dhe në anën tjetër të rrugës, zonë e cila është e gjitha me ullishte. Edhe pse kanë kaluar më shumë se 2 orë që nga rënia e zjarrit, flakët vijojnë të përhapen me shpejtësi, ndërsa konsiderohen si të rrezikshme. Dyshimet e para janë për zjarrvënie të qëllimshme, mirëpo kjo ende nuk është e konfirmuar. Vatra e zjarrit ka shkaktuar dëme të shumta materiale, mirëpo fatmirësisht është larg zonës së banuar dhe nuk raportohet per lëndime.