Autoritetet shëndetësore në Vietnam, kanë thënë se kanë identifikuar një variant të ri të koronavirusit, që ka një orgjinë të përzier mes variantit britanik dhe atij indian, dhe është i transmetueshëm nga ajri. Ministri i Shëndetësisë i vendit, Nguyen Thanh Long tha të shtunën se virusi është vërejtur te pacientët vendas. “Ministria e Shëndetësisë mund të shpallë variantin e ri të koronavirusit në hartën globale”, ka thënë Long. Sipas tij, varianti vietnamez, i cili nuk ka emër, duket se ka ngjashmëri me variantin indian, i cili ka mutacione që fillimisht janë identifikuar te varianti britanik. Varianti britanik konsiderohet lehtësisht i transmetueshëm njëlloj si variantet indiane, por këto të fundit besohet se janë edhe më rezistente ndaj antitrupave. Testet laboratorike kanë sugjeruar se varianti vietnamez riprodhohet jashtëzakonisht shpejt, ka thënë Long. Riprodhimi i shpejtë mund të rrisë mundësinë e shfaqjes së mutacioneve midis patogjenëve të tillë. Vietnami ka pasur një numër relativisht të ulët të rasteve gjatë muajve të pandemisë, por është përballur me një rritje të shpejtë të shkallës së infektimit në muajin e kaluar. Në Vietnam janë raportuar shtatë variante të koronavirusit, katër britanike dhe tri indiane.