Në Durrës është shënuar viktima e parë nga përmbytjet që kanë përfshirë vendin prej fillimit të kësaj jave. Ai është 54 vjeçari, Astrit Hysenaj, që rezultonte i zhdukur prej ditës së martë. Hysenaj është gjetur i mbytur në kanalin kullues pranë zonës së Plazhit. Dyshohet se 54-vjeçarin e ka marrë vërshimi i ujit ditën e martë, kur ishte dita e parë e përmbytjeve masive në qytetin e Durrësit, teksa ishte duke ushtruar detyrën si punonjës i ndërmarrjes së pastrimit në bashkinë e këtij qytetit. Trupi i viktimës është gjetur këtë të enjte nga polumbarët e RENEA-s. Bashkia e Durrësit ka reaguar zyrtarisht në lidhje me këtë rast, duke deklaruar se Hysenaj është paraqitur të martën në orën 06:00 në punë dhe është larguar prej andej në orën 10:30 të po së njëjtës ditë.