Numri i rasteve të reja me Covid të raportuara në 24 orët e fundit mbetet i lartë. 31 persona kanë rezultuar pozitiv, sipas Ministrisë së Shëndetësisë, ndërkohë që në krahasim me një ditë më parë, ku u regjistruan 34 raste, janë kryer rreth 1 mijë testime më pak. Në 24 orët e fundit, fatmirësisht, nuk ka patur asnjë viktimë nga koronavirusi, cka përbën një lajm të mirë, ndërkohë që në total në të gjithë vendin janë 254 raste aktive. Vetëm gjashtë janë pacientët e shtruar në spitalin infektiv. Dibra ndërkaq mbetet qarku i vetëm në vend pa asnjë rast të koronavirusit. Ministria e shëndetësisë i ka bërë sërish apel qytetarëve që të vaksinohen për tu mbrojtur nga covid 19, në cdo qendër shëndetësore dhe pikë vaksinimi. Vazhdojnë sipas saj ditët e hapura të vaksinimit, deri të dielën, dhe të gjithë qytetarët mbi 18 vjec mund të paraqiten për të marrë dozën e parë. Apeli për vaksinim përsëritet në vijimësi nga ministria, kjo edhe për shkak të frikës nga varianti Delta, që ende nuk është konfirmuar në vendin tonë por që ekspertët e shohin të rrezikshëm për shkak se është shumë më infektues se variantet e mëhershme të koronavirusit të ri.