Kryebashkiaku i Tiranës, Erion Veliaj mori pjesë personalisht në seancën paraprake të Gjykatës së Posaçme, mbajtur këtë të martë. Veliaj e nisi fjalën duke deklaruar se vonesa për të folur para gjykatës nuk lidhej me mungesën e respektit për drejtësinë, por me këmbënguljen e tij për t’iu garantuar një proces i drejtë dhe me standarde të larta. Kryebashkiaku tha se deri më tani kjo ka dështuar. Dubel veliaj - Gjatë gjithë këtyre muajve kam kërkuar vetëm të drejta elementare, të drejta që Kushtetuta e Republikës së Shqipërisë ia garanton çdo qytetari pa përjashtim, por që mua, deri më sot, nuk më është bërë e mundur t’i ushtroj. Kam kërkuar dinjitet dhe të kem akses të plotë, të pakufizuar dhe real, si dhe kohën e kushtet e nevojshme për të lexuar aktet, provat dhe çdo deklarim mbi të cilat është ndërtuar akuza që më ka sjellë para Jush dhe më ka vendosur në izolim. Fakti që mua personalisht, nuk më është vënë ende në dispozicion një kopje fizike e akteve, si dhe koha minimale për t’u njohur me një akuzë të ndërtuar mbi rreth 60 mijë faqe, flet qartë për fatin procedural që po i përgatitet këtij procesi.