Që nga vitet ’80 kemi dëgjuar se sistemet e mbrojtjes anti-raketë janë të kota, por Izraeli po ua njeh vlerën në këto ditë të trazuara. Shembulli I fundit është suksesi i Iron Dome, Kupolës së Hekurt të Izraelit, në pakësimin e dëmeve njerëzore dhe materiale nga sulmet palestineze me raketa. Që prej të enjtes së shkuar, Hamasi dhe Xhihadi Islamik, dy grupe terroriste të mbështetura nga Irani, kanë lëshuar mbi 1700 raketa drejt Izraelit. Por, raketat e sistemit Iron Dome që ndricojnë qiellin e natës mbi Tel Aviv, kanë arritur të asgjesojnë 90 % të raketave të Hamasit. Izraeli dhe SHBA kanë investuar për dekada me radhë në sistemet mbrojtëse raketore, por kryesisht kanë patur në fokus asgjësimin e raketave me rreze të gjatë. Iron Dome është projektuar për të mbrojtur një territor të vogël nga sulme që nisin pranë kufirit izraelit. Iron Dome shpëton jetë dhe prona izraelite, por mbi të gjitha ndryshon skemën e propagandës së kundërshtarëve. Më pak viktima në Izrael, do të thotë më pak trysni e brendshme politike për një pushtim të plotë të Gazës, ose për sulme ajrore që do të vrisnin njerëz të pafajshëm. Civilët e vrarë në Palestinë janë pika e fortë e propagandës së Hamasit, dhe kështu, përmbajtja e Izraelit përvec se shpëton jetë, e shfajëson disi atë edhe në sytë e opinionit ndërkombëtar. Izraeli synon gjithashtu t’i cojë një mesazh Iranit si dhe Hezbollahut në Liban, duke ditur arsenalet e tyre prej dhjetëra mijëra raketash.