Komanda qendrore amerikane ka publikuar një video që tregon ekuipazhin duke operuar në aeroplanmbajtësen USS Abraham Lincoln, ndërsa avionët luftarakë ngrihen prej saj. SHBA ka vendosur një grup detar të udhëhequr nga USS Abraham Lincoln në Lindjen e Mesme, duke i bërë presion iranit, ndërkohë që ky i fundit kërcënon se do të hakmerret kundër bazave dhe anijeve amerikane në rajon nëse sulmohet. E në një situatë të tillë, zyrtarët iranianë dhe amerikanë takohen në Oman për një raund diplomacie, që shihet si përpjekja e fundit për të shmangur një përshkallëzim të madh ushtarak në Gjirin Persik. I dërguari i posaçëm i SHBA-së, Steve Ëitkoff, i cili ka udhëhequr bisedimet për presidentin Donald Trump me synim përfundimin e konflikteve nga Rripi i Gazës deri në Ukrainë, do të kryesojë delegacionin amerikan në bisedimet me ministrin e Jashtëm, Abbas Araqchi, fytyra kryesore e Teheranit në frontin diplomatik ndërkombëtar, si dhe me disa zyrtarë të tjerë të lartë iranianë. Edhe pse përbërjet e delegacioneve mund të jenë të përcaktuara, agjenda e saktë e bisedimeve mbetet e panjohur. Ajo që është e qartë është se, me Uashingtonin që ka dërguar anije luftarake në ujërat e Lindjes së Mesme ditët e fundit, rreziku është i lartë.