Serbia ka lëvizur ushtrinë vetëm pak metra larg kufirit me Kosovën. Denoncimi është bërë nga Kryeministri Albin Kurti. Kurti thotë se me këtë lëvizje, Beogradi ka provokuar sërish duke afruar trupat ushtarake vetëm 50 metër larg vijës ndarëse me Kosovën, pranë territorit të komunës së Kamenicës. Kurti thotë se institucionet e sigurisë së Kosovës kanë mbikëqyrur këto lëvizje dhe se ushtria serbe, pasi ka vënë re që është pikasur është tërhequr në thellësi të territorit serb. Kryeministri i Kosovës thotë se lëvizjet matanë kufirit janë në vazhdën e përpjekjeve provokuese të Serbisë për nxitjen e tensioneve dhe konfliktit në Kosovë. ‘Serbia vazhdon të nxisë tensione nëpërmjet veprimeve hibride, duke synuar destabilizimin e rajonit, megjithëse hapësira për këto manovra po i ngushtohet dita-ditës’, shkruan ai. Kosova mbetet e palëkundur në rrugën e saj drejt integrimeve euro-atlantike, me institucionet e saj vigjilente, duke mbrojtur vendin e duke siguruar monitorim maksimal të situatës, mbyll reagimin e tij Kryeministri i Kosovës.