Kontigjenti shtesë i trupave turke në kuadër të misionit të KFOR-it në Kosovës është stacionuar në Zubin Potok, një prej katër komunave në veri të vendit, ku situata është e tensionuar prej fillimit të këtij muaji. Siç shihet në këtë foto, ushtarët turq kanë marrë në dorëzim ruajtjen e rendit dhe të sigurisë, pas protestave të serbëve kundër kryetarëve të rinj shqiptarë në këto komuna. Kontigjenti shtesë turk u njoftua pas kërkesës së NATO-s për më shumë trupa në Kosovë. Turqia ishte ndër vendet e para që iu përgjigj thirrjes. Presidenti turk, Recep Tayyip Erdogan, ka deklaruar se përparimi në dialog mes Kosovës dhe Serbisë, është mënyra e vetme për paqe afatgjatë dhe stabilitet në rajon dhe se Turqia është gati të kontribuojë. Dhuna e ka nxitur NATO-n që të angazhojë 700 trupa shtesë në Kosovë, përveç 4.000 trupave që veçse janë në këtë shtet.