Në nisje të sesionit të ri parlamentar, Presidenti Bajram Begaj u ka dërguar një mesazh deputetëve, duke kërkuar prej tyre përgjegjësi në përmbushjen e detyrës Kushtetuese, teksa shton se nën cilësinë e kreut të shtetit do të bashkëpunojë me Kuvendin, si detyrim që rrjedh nga Kushtetuta e vendit. : “Për mua si President i Republikës, bashkëpunimi me Kuvendin është jo vetëm përgjegjësi e përmbushjes së detyrës kushtetuese, por më shumë se kaq është shprehje e bindjes dhe e besimit se bashkërisht mund të shpalosim një dimension tjetër qasjeje dhe sjelljeje politike, në përputhje me atë që pret shoqëria shqiptare nga klasa politike dhe nga përfaqësuesit e zgjedhur prej saj. Marrja e vendimit të çeljes së negociatava me Bashkimin Europian, domosdoshmërisht imponon për të gjithë ne, reflektim dhe më shumë përgjegjshmëri, seriozitet dhe më shumë përkushtim. Na duhet të jemi po aq europianë për nga vizioni dhe standardet e sjelljes politike, e cila të reflektojë pikërisht këtë realitet të ri të marrëdhënieve të Shqipërisë me Bashkimin Europian. Një tjetër këshillë që vjen nga kostumi presidencial i Begajt është edhe dialogu politik, gjithëpërfshirja dhe konsensusi duhet të jenë lajtmotivi i punës parlamentare sepse vendi nuk mund të paguajë koston e mungesës së tyre.