Kryeministri i Serbisë, Millosh Vuçeviç, tha të mërkurën se beson se Qeveria në Kosovë po planifikon "të hapë me forcë" urën mbi Ibër me qëllim që të bashkojë Mitrovicën veriore dhe atë jugore. "Fatkeqësisht, veprimet dhe lëvizjet e papërgjegjshme të Albin Kurtit, vazhdojnë. Plani i tij është që të hapë urën e Ibrit dhe në këtë mënyrë të lidhë me forcë Mitrovicën Veriore dhe Jugore, po flasim edhe për trafikun rrugor” tha ai në një intervistë për televizionin shtetëror serb. Por, Vucevic shtoi se përkundër situatës së vështirë, është i kënaqur me reagimet e bashkësisë ndërkombëtare, mbi të gjitha me reagimet e kreut të KFOR-it. “Dje, shefi i Shtabit të Përgjithshëm të Serbisë ka pasur bisedime me komandantin e KFOR-it dhe ia ka përcjellë shumë qartë qëndrimet tona. Petar Petkoviq, si drejtor i Zyrës për Kosovën, i njoftoi përfaqësuesit e vendeve të Quint-it për përpjekjen e madhe për destabilizimin e pjesës veriore të Kosovës për shkak të aktiviteteve të regjimit të Kurtit. Shpresoj që të gjithë të jenë të arsyeshëm dhe të matur për të mos lejuar që këto gjëra të ndodhin, dhe nëse ndodh, nuk mund ta kuptoj vërtet se si nuk kanë mjete dhe instrumente për të frenuar Albin Kurtin. Nuk mund ta pranoj këtë. Se të gjithë i thonë se nuk duhet ta bëjë, por gjithsesi ai e bën”, tha Vuçeviç. Sipas tij, populli serb çdo ditë është nën presion të madh dhe akuzoi Prishtinën se ka uzurpuar prona, objekte biznesi dhe banesa në veri të Mitrovicës, ndërkohë që çdo ditë arrestohen njerëz.