Është ulur në mënyrë të ndjeshme numri i rasteve të reja me Covid 19 në vendin tonë. Ministria e Shëndetësisë ka bërë të ditur se janë shënuar 53 raste të reja, si rezultat i 1535 testimeve të kryera ndaj personave të dyshuar. Kjo është shifra më e ulët e të prekurve me koronavirus në vendin tonë prej shumë muajsh, ku numri i infektimeve sidomos në periudhën e dimrit arriti mbi 1000 të prekur në ditë. Nga 53 infektimet e kësaj të dielë, 13 raste janë shënuar në Tiranë, 6 raste në Fier, nga 5 raste në Durrës dhe Devoll, nga 3 raste në Shkodër, Mallakastër dhe më pak raste në bashkitë e tjera të vendit. Ulja e infektimeve ditore flet për një situatë të stabilizuar të pandemisë në vend, dhe efektet e vaksinimit masiv kanë filluar të ndihen. Ndërkohë një qytetar 77 vjeçar nga Korça e ka humbur betejën me COVID19, duke e çuar numrin e viktimave që nga fillimi i pandemisë në 2397 persona. Është ulur ndjeshëm edhe numri i të shtruarve në 2 spitalet COVID ku po trajtohen 124 pacientë, 12 në terapi intensive, nga të cilët 4 pacientë janë të intubuar. Në 24 orët e fundit janë shëruar 748 qytetarë, duke e çuar numrin e të shëruarve në 110,920 që nga fillimi i epidemisë. Ndërsa rastet aktive edhe pse kanë pësuar rënie, vijojnë të jenë të lartë, dhe janë përkatësisht 17 921 persona të prekur nga koronavirusi. Që nga fillimi i pandemisë në vendin tonë kanë rezultuar pozitiv me covid 19, 131 238 persona.