Ndihmësi i presidentit rus Vladimir Putin, Nikolai Patrushev, paralajmëroi se Ukraina mund të "pushojë së ekzistuari" në vitin 2025. Patrushev, i cili ka shërbyer më parë si sekretar i Këshillit të Sigurimit të Rusisë, i bëri komentet për gazetat pro-Kremlinit, ndërsa fliste për mandatin e dytë të Presidentit të zgjedhur amerikan Donald Trump. Ndërsa presidenti Joe Biden ka qenë një aleat i madh i Presidentit ukrainas Volodymyr Zelensky në luftën e tij kundër pushtimit të plotë të Putinit që filloi gati tre vjet më parë, është e paqartë se si Trump planifikon të trajtojë luftën Rusi-Ukrainë pasi të inaugurohet në 20 janar. Megjithatë, Trump ka thënë se nëse do të ishte në tryezën e bisedimeve me Putinin dhe Zelenskin, lufta do të përfundonte “brenda 24 orëve”. Patrushev pranoi ndërkohë në intervistë se "një pjesë e madhe e botës ende shikon nga Amerika" por shtoi se "vetë elita amerikane është e ndarë". Pasi deklaroi se politikat e Trumpit ndaj kombeve të tjera mbeten "të paqarta", Patrushev nuk u kursye me kritikat ndaj administratës së Biden. Kur iu përgjigj një pyetjeje rreth lëshimeve të mundshme territoriale gjatë negociatave të paqes nën Trump, Patrushev bëri parashikimin e tij që Ukraina mund të mos jetë më një shtet sovran deri në fund të vitit. Ai fillimisht theksoi se rusët ndiejnë një lidhje "vëllazërore" me ukrainasit për shkak të "lidhjeve shekullore mes tyre" përpara se të thoshte se "shtrëngimi i dhunshëm në ideologjinë neo-naziste dhe rusofobia e shfrenuar" duhet të fajësohen për shkatërrimin e qyteteve në Ukrainë. "Është e mundur që këtë vit Ukraina të pushojë së ekzistuari fare," tha Patrushev që më herët, ka bërë parashikime të ngjashme edhe për moldavinë.