Rusia tha të enjten se rrëzoi 105 dronë ukrainas mbi rajonet ruse, përfshirë dhjetëra të drejtuar për në Moskë, në një kohë kur lufta në Ukrainë po nxehet dhe fuqitë e mëdha diskutojnë mënyrat për t'i dhënë fund konfliktit më vdekjeprurës në Evropë që nga Lufta e Dytë Botërore. Ndërsa Rusia, Ukraina, Shtetet e Bashkuara dhe fuqitë evropiane shqyrtojnë mundësitë e përfundimit të konfliktit më shumë se trevjeçar në Ukrainë, lufta me dronë vazhdon dhe luftimet po intensifikohen në disa zona kyçe të frontit. Ministria e mbrojtjes së Rusisë tha se 105 dronë ishin rrëzuar mbi rajonet ruse mes mesnatës dhe mëngjesit të hershëm të së enjtes, përfshirë 35 mbi rajonin e Moskës. Një ditë më parë, Rusia tha se rrëzoi mbi 300 dronë ukrainas. Sergei Sobyanin, kryebashkiaku i Moskës, tha se shumë dronë ishin rrëzuar ndërsa shkonin drejt kryeqytetit, i cili së bashku me rajonin përreth ka një popullsi prej 21 milionë banorësh. Trafiku ajror rreth Moskës u ndërpre ndërkohë me mbërritjet dhe nisjet në Aeroportin Domodedovo të qytetit të pezulluara përkohësisht, tha të enjten organi mbikëqyrës i aviacionit rus Rosaviatsia. "Specialistët e shërbimeve të emergjencës po punojnë në vendin e rrëzimit të mbeturinave", shkroi Sobyanin, në një postim në Telegram.