Ndalimi i reshjeve të shiut në zonat e ulëta dhe dëborës në zonat malore ka përmirësuar situatën sa i përket përmbytjeve dhe kalueshmërisë së akseve rrugore nacionale dhe rurale. Të dhënat nga autoritetet vendor dhe emergjencat civile të ngritura në çdo qark tregojnë se nga Shkodra në Lezhë, Durrës, Fier dhe Vlorë sipërfaqet e tokave të përmbytura janë reduktuar, ndërsa prurjet e lumenjve priren drejt rënies së nivelit. Në Shkodër, nga 1200 hektarë tokë që ishte nën ujë ditën e diel, mëngjesin e të hënës autoritetet raportojnë reduktim në 940 hektarë, kryesisht në zonën e Obotit. Sipas njoftimit në këtë zonë ka ende banesa të rrethuara nga uji, por në asnjërën prej tyre nuk ka përmbytje të brendshme. Prurjet e Bunës dhe të Drinit gjithashtu janë në tendencë uljeje, edhe pse një ditë më parë nisën shkarkimet e kontrolluara edhe nga Hidrocentrali i Fierzës. Në qarkun e Lezhës situate problematike mbetet në Bashkinë e Kurbinit, sidomos në fshatin Adriatik. Edhe në këtë zonë, autoritetet njoftojnë rënie të nivelit të ujit nëpër banesat e përmbytura dhe tokën bujqësore, teksa grupet e verifikimit në terren po llogarisin dëmet. Problematika më e madhe në Durrës mbetet në zonën e ish Kënetës, Sukth, Katund të Ri dhe Hamallaj. Prurjet e shtuara të Erzenit kanë shkaktuar probleme në Katund të Ri, ku autoritetet njoftojnë se janë evakuuar mbrëmjen e së dielës gjashtë familje që kishin refuzuar zhvendosjen më herët.