Kryeministri i Kosovës, Avdullah Hoti u takua me një delegacion të Departamentit amerikan të Energjisë, për të diskutuar zbatimin e projekteve për të cilat është arritur pajtueshmëri më 4 shtator në Uashington. Përveç Hotit, pjesë e delegacionit të Kosovës ishin dhe zëvendëskryeministri Driton Selmanaj dhe Ministri i Ekonomisë dhe Ambientit, Blerim Kuçi derisa përballë kanë pasur kryesuesin e delegacionit amerikan, Matthew Zais, ambasadorin amerikan në Kosovë, Philip Kosnett dhe përfaqësues të Agjencisë amerikane për Zhvillim Ndërkombëtar (USAID). Kryeministria ka njoftuar se përgjatë takimit në objektin e Qeverisë së Kosovës janë diskutuar nevojat ekonomike dhe energjetike të Kosovës, të parapara edhe në Marrëveshjen e Washingtonit. Javën e kaluar Kosova është vënë në lëvizje për të zbatuar një tjetër pikë të marrëveshjes së nënshkruar në Shtëpinë e Bardhë. Ajo ka të bëjë me rrjetin 5G dhe përdorimin e pajisjeve të teknologjisë nga shitës të sigurt. Kosova nis zbatimin e një pike nga marrëveshja e Washingtonit, Ambasada Amerikane e përgëzon. Pas një takimi të zhvilluar të premten me përfaqësues të Autoritetit Rregullativ të Komunikimeve Elektronike dhe Postare (ARKEP), si organi më kompetent në fushën e komunikimeve elektronike, kryeministri Hoti tha se Kosova do të ndalojë përdorimin e pajisjeve 5G, të siguruara nga shitës jot e besueshëm, në rrjetet e tyre të komunikimit.