Një nga të plagosurit e aksidentit në qytetin e Burrelit, në vendin e quajtur 'ish grumbullimi' ka humbur jetën në spital. 74-vjeçari Veli Bunga nuk ka mundur t’i mbijetojë plagëve të marra nga përplasja e automjetit tip ‘Benz’ që drejtohej nga 28-vjeçari Ylber Xhepavdija. Më parë policia ka vënë në pranga 28-vjeçarin, i cili pasi humbi kontrollin e mjetit që drejtonte, përplasi katër këmbësorët. Pas kësaj ai u largua nga vendngjarja me ndihmën e një bashkëpunëtori. Pas disa orësh në arrati, policia ka arritur të arrestojë autorin dhe shtetasin tjetër me iniciale A.B. Dyshohet se ky i fundit me mjetin e tij, ka ndihmuar autorin, të largohej nga vendi i ngjarjes dhe t’i shpëtonte përkohësisht policisë. Ndërkohë mësohet se mbesa e 74 vjeçarit si dhe 2 personat e tjerë të aksidentuar janë në gjendje të rëndë shëndetësore në spital.