Prej 10 Janarit, autoritetet shqiptare vijojnë kërkimet për gjetjen e trupit të 30 vjeçarit Jurgen Karaj nga fshati Fullqet i Klosit i cili dyshohet të jetë rrëmbyer nga rrjedha e ujit të përroit të Darsit. Prej 29 janarit, kërkimeve ju është bashkuar edhe një grup i specializuar nga Forcat e Sigurisë së Kosovës. Që 26 ditë kërkimet në rrjedhën e lumit Mat janë bërë pa ndërprerje ku çdo ditë në terren kanë qenë dhjetëra forca të Batalionit të Tretë të Repartit të Këmbësorisë Burrel, familjarë të Jurgenit e struktura të tjera. E gjithë vija lumore e lumit të Matit është kontrolluar disa herë, por pa mundur të gjejnë trupin e 30 vjeçarit ose ndonjë shenjë të tij. Sakaq, kërkimet janë shtrirë edhe basenin ujor të liqenit të Ulzës. Forcat e Sigurisë së Kosovës kanë lëshuar dronin nënujor në hyrje të liqenit duke bërë të mundur kontrollin edhe në thellësi të tij. 30-vjeçari ndodhej si pasagjer në një automjet që drejtohej nga 24-vjeçar, Andi Losha, kur ky i fundit humbi kontrollin dhe makina përfundoi në përrua. 24-vjeçari arriti që të dalë nga makina dhe të mbijetojë, ndërsa 30-vjeçari dyshohet se është marrë nga rrjedha e ujit. Losha është arrestuar, pasi dyshohet se e drejtonte makinën në gjendje të dehur dhe nuk i dha ndihmë pasagjerit, ndërsa nuk njoftoi policinë, por u largua nga vendngjarja.