Një ngjarje e rëndë është raportuar në fshatin Madhesh, në njësinë administrative Ulëz të Bashkisë Mat, ku një 23-vjeçar i identifikuar si Renis Dobra është gjetur pa shenja jete buzë liqenit të Shkopetit, në zonën e quajtur Sektori C. Fillimisht familjarët e tij kishin denoncuar në komisariatin e Matit zhdukjen e tij një natë më parë. Policia nisi kërkimet dhe pas disa orësh arriti të gjejë trupin e viktimës. Sipas raportimeve, trupi ka shenja dhune dhe mavijosje në qafë. Një pistë hetimore që po ndiqet është ajo e rrëmbimit, ku dyshohet se 23-vjeçari është mbytur, më pas është futur në makinën e tij dhe është hedhur në liqenin e Shkopetit për të fshehur gjurmët. Megjithatë, makina duket se është nxjerrë jashtë uji gjatë rrokullisjes. Sakaq vijojnë hetimet për zbardhjen e plotë të dinamikës së ngjarjes.