Zjarri në Landfillin e Elbasanit vazhdon të jetë aktiv prej më shumë se 15 orësh, duke shkaktuar një ndotje të konsiderueshme të ajrit në gjithë zonën përreth. Tymi i dendur dhe toksik ka përfshirë qytetin e Elbasanit gjatë natës, pasi era e fortë që frynte nga perëndimi e ka përhapur atë drejt lindjes. Ndërsa këtë të mërkurë me ndryshimin e drejtimit të erës, tymi ka arritur deri në Cerrik. Disa dhjetëra efektivë zjarrfikës janë angazhuar për të shuar flakët. Situata paraqitet e vështirë për shkak të përmasave të mëdha të zjarrit, materialeve të rrezikshme që po digjen, si plastika dhe mbetje organike – si dhe për shkak të temperaturave të larta dhe erës së fortë që favorizon përhapjen e flakëve. Në mbështetje të zjarrfikësve të Elbasanit, janë bashkuar edhe zjarrfikësit nga Berati. Pavarësisht përpjekjeve të vazhdueshme, situata ende nuk është vënë nën kontroll.