Drejtuesit e pushtetit lokal në disa ishuj grekë kanë depozituar në qeverinë qendrore një kërkesë për të aplikuar një tarifë për çdo turist, të ngjashme me skemën që ka nisur të zbatojë prej kohësh qyteti i Venecias në Itali. Nisma është ideuar fillimisht nga bashkia e ishullit Symi, që ndodhet rreth 40 kilometra në veri perëndim të Rodosit. Me një popullsi vendase prej pak më shumë se 20 mijë banorë, ishulli pret në pikun e sezonit deri në 6 mijë turistë çdo ditë. Fluksi, sipas kryebashkiakut, rrit me kosto financiare shtesë nevojat për shërbime nga autoritetet vendore, siç janë pastrimi, mirëmbajtja e plazheve dhe rrugëve dhe furnizimi me ujë. Kërkesa është mbështetur edhe nga bashkia e Paksosit, ishulli i vogël në ujërat e detit Jon, pranë Korfuzit, si dhe nga bashkia e Itakës.