Shtëpia e Bardhë ka publikuar strategjinë kombëtare të sigurisë, që në përmbajtje të saj sugjeron një trajektore të re diplomatike të Shteteve të Bashkuara të Amerikës, ndaj Europës, jo vetëm te emigracioni, por edhe te politika e brendshme. Strategjia sugjeron se Uashingtoni do të luajë një rol më aktiv në politikat e brendshme të shteteve europiane, duke mos përjashtuar mbështetjen e hapur për ato parti që ndajnë të njëjtat vlera me Donald Trump sa i përket emigracionit dhe luftës në Ukrainë. Sipas dokumentit, Uashingtoni do të punojë për të kultivuar rezistencë brenda Europës, duke identifikuar si aleatë potencialë lëvizjet patriotike, si ajo e Le Pen në Francë, AFD në Gjermani, Nigel Farage në Britaninë e Madhe, apo Meloni në Itali. Sa i takon luftës në Ukrainë, strategjia e Donald Trump fajëson udhëheqësit e Bashkimit Europian se po pengojnë arritjen e paqes, megjithëse pjesa dërrmuese e qytetarëve të BE-së kërkon dhënien fund të konfliktit.