Presidenti ukrainas Volodymyr Zelensky tha se shpreson që SHBA-ja të “qëndrojë e fortë” përballë kërkesave ruse për të hequr sanksionet si kusht për një armëpushim në Detin e Zi. Moska tha se një armëpushim detar i shpallur të martën për të lejuar kalimin e sigurt për anijet tregtare do të fillojë vetëm pasi të hiqen kufizimet perëndimore në tregtinë ruse të ushqimit dhe plehrave. Shtëpia e Bardhë tha të martën se delegacionet ruse dhe ukrainase kishin rënë dakord për një armëpushim në Detin e Zi pas tre ditësh bisedime të veçanta me zyrtarët amerikanë në Arabinë Saudite. Por disa orë më vonë, Kremlini lëshoi deklaratën e tij duke përfshirë një listë të kushteve. Kërkesat e tij përfshijnë revokimin e sanksioneve perëndimore ndaj institucioneve financiare të përfshira në tregtinë bujqësore dhe rivendosjen e aksesit të tyre në sistemin ndërkombëtar të pagesave Sëift - një rrjet që lehtëson mesazhet e sigurta financiare. Trump tha se qeveria amerikane po "shqyrtonte" kërkesën e Moskës për heqjen e kufizimeve, por BE tha të mërkurën se nuk do të konsideronte heqjen e sanksioneve përpara tërheqjes "të pakushtëzuar" të trupave ruse nga territori i njohur ndërkombëtarisht i Ukrainës. Duke folur në Paris, Zelensky tha se ishte "shumë mirënjohës" për mbështetjen dypartiake nga SHBA, por tha se kishte frikë se disa ishin "nën ndikimin e narrativave ruse". "Ne nuk mund të pajtohemi me ato narrativa," tha ai. Kur u pyet nëse presidenti amerikan Donald Trump kishte një marrëdhënie më të ngushtë me të apo me presidentin rus Vladimir Putin, Zelensky tha se nuk e dinte. “Nuk e di – e kam të vështirë ta them”, tha ai. “Nuk e di çfarë marrëdhëniesh ka, nuk e di sa biseda ka bërë”. Presidenti ukrainas foli pas takimit me presidentin francez Emmanuel Macron, në Paris, ku kulla eifel u ndricua me ngjyrat e flamurit ukrainas për nder të tij.